Karnaval ta tras di lomba i trabou ta kuminsá normal atrobe. Of nò?? Na diferente instansia bo ta tende ku doño di trabou ta keha ku trahadónan ta keda sin bin trabou òf ta mèldu nan mes malu despues òf durante di dianan di fiesta. Aparentemente pues tin diskushon riba e tereno aki. Ban wak kiko ta e diferente interesnan.

E trahadó tin interes di tin sufisiente dia di fakansi pa e por disfrutá, deskansá i relahá na e manera ku e ta haña ta bon. Esaki no solamente ta bon pa e trahadó, sino pa e doño di trabou tambe. Un trahadó ku por gosa di bida i tin tempu pa relahá ta mas kontentu, mas energétiko i mas produktivo na trabou. Sin embargo, e trahadó tin derechi riba su dianan di fakansi, ku pago di salario. Di akuerdo ku lei, anualmente esaki ta minimal 3 biaha e kantidat di dia ku e trahadó ta traha pa siman (no mas ku 5). Pues un persona ku ta traha 5 òf mas dia pa siman ta haña 15 dia di fakansi pa aña. Un persona ku ta traha 4 dia pa siman, ta haña 12 dia pa aña. Esaki ta un trata un mínimo, pues partidonan semper por palabrá mas dia pa aña.

Interes di e doño di trabou ta pa su kompanía i negoshi keda drai den tur tempu i apesar òf juist durante dianan di fiesta. I no ta solamente e doño di trabou ta benefisiá di esaki, sino tambe e trahadó. Paso si negoshi no ta kana bon, no tin trabou. E doño di trabou tin interes pa su trahadónan bin traha segun nan schedule. Un trahadó ku no bin traha, partikularmente si e no ta notifiká e doño di trabou na tempu òf ta keda sin notifiká mes, por ta frustrante i ta stroba e negoshi. Ademas, esaki por ta motibu tambe pa duna e trahadó un atvertensia ofisial (waarschuwing) i hasta por ta un motibu pa retirá un trahadó. Esaki por ta e kaso tambe si e trahadó ta mèldu ku e ta malu pero ta resultá ku e tabata gosa den karnaval.

Pa evitá malkontentu i otro konsekuensia, doño di  trabou: sòru di duna bo trahadónan e dianan di fakansi ku nan tin derechi riba dje ku pago di salario i sòru ku durante aña nan ta haña chens tambe di tuma nan dianan. Trahadó: sòru pa bo gosa di bo dianan, pidi bo dianan di fakansi delantá i kordiná ku koleganan pa wak ken por tuma su dianan den ki temporada. Paso naturalmente no ta tur hende por tuma fakansi den mesun periodo. Korda ku e doño di trabou tin derechi di ninga dianan di fakansi si esaki no ta den mihó interes di e negoshi. Semper bai si, ku interes di trahadó tambe na bista. En todo kaso ta importante pa partidonan komuniká ku otro na manera honesto tokante motibunan i espektativanan.

Bo tin pregunta riba tereno di lei laboral? Tuma kontakto via email info@justacuracao.com òf jama 675-0610 pa un sita.