Partidonan a traha un temporada huntu i despues e relashon di trabou a jega na su final. Esaki por ta pa kualke motibu, por ehèmpel si e empleado a haña un otro trabou, doño di trabou a terminá e relashon, òf partidonan a kumbiní un temporada fiho durante kual e empleado lo ta den servisio i e temporada a jega na su fin. Den tur kaso, e trahadó tin derechi di haña un sertifikado (getuigschrift) den kual ta skirbí ki trabou ela hasi, pa kuantu tempu etc. Esaki por ta benefisioso pa e empleado ku ta buska otro trabou, komo ku asina e tin prueba di su historia di labor i tin doño di trabou ku ta pidi e sertifikadonan aki den kuadro di e proseso di solisitut.

Segun nos lei, e doño di  trabou ta obligá na duna e empleado un sertifikado na final di e relashon laboral, si e empleado pidi p’e. Kosnan ku mester ta inkluí den e sertifikado ta e trabounan ku e empleado a hasi i e durashon di e relashon laboral. Lokual tambe e doño di trabou mester inkluí, pero solamente si e empleado ta pidi esaki, ta e manera ku e empleado a funshoná i e motibu pakiko e relashon laboral a terminá. Den kaso ku e doño di trabou a terminá e kontrato laboral sin duna motibu, e ta obligá solamente pa inkluí esaki den e sertifikado, sin mester duna e motibu di terminashon. Si den kaso ku ta e empleado a terminá e relashon laboral i e mester a paga daño i perhuisio pa motibu di esaki, e doño di trabou por inkluí esaki den e sertifikado.

Kualke doño di trabou ku ta ninga duna un sertifikado, òf ku konsientemente ta inkluí informashon robes den e sertifikado lo keda responsabel pa kualke daño ku e empleado òf un terser partido sufri.

Doño di trabou no por eksluí e klóusula aki for di relashon laboral. Kada klóusula den un kontrato ku ta limitá e debernan aki di e doño di trabou, ta keda konsiderá komo nulo i pues no ta bálido.

Manera menshoná anteriormente, e sertifikado por ta benefisioso pa e empleado, den kuadro di su futuro laboral. Pues den kada kaso ta konsehabel pa e empleado pidi esaki serka su doño di trabou na momento ku e kontrato laboral terminá. Ni maske kiko e situashon ta, e doño di trabou ta obligá na dun’é.

Pa kualke pregunta, tuma kontakto ku nos via email info@justacuracao.com òf via telefòn 675-0610.