Segun lei, kada empleado ku a traha henter aña sin interupshon pa e mesun doño di trabou, tin derecho pa aña riba 3 biaha e kantidat di dia ku e ta traha pa siman. Pues e empleado ku ta traha 5 dia pa siman, mester haña 15 dia di fakansi pa aña. Dimes partidonan por kumbiní mas tantu ku esaki, pero esaki ta e mínimo segun lei. Tuma nota ku e empleado ku ta traha 6 dia pa siman, tambe ta haña 15 dia di fakansi pa aña segun lei.

Sin embargo, e derecho riba fakansi ta vense si e empleado tabata malu o inkapabel pa traha en total durante di un mínimo di 6 luna den a aña konserní.

Segun lei e dianan di fakansi mester keda tumá preferibelmente tras di otro. Si e empleado ta deseá i si e trabou ta permití, por tuma e dianan di fakansi den parti, basta ku mitar di e dianan si keda tumá den un biaha. Esaki ta basá riba e idea ku e empleado mester di su deskanso i tempu liber den kuadro di su salú.

E desishon pa ku e dia ku e fakansi ta kuminsá i te ki dia e ta dura, ta den man di e doño di trabou. Sin embargo, e doño di trabou ta trata mas tantu ku ta posibel di tene na kuenta e deseonan di e empleado.

Si e interes di e negoshi ta hustifiká esaki, e doño di trabou por posponé un fakansi ku ya ta planiá kaba.

Si e empleado bira malu durante su fakansi, e dianan ku a sobra di fakansi ta keda konsiderá komo no tumá. Pues e empleado ta keda ku su dianan di fakansi.

Dianan di fakansi ku no a keda tumá den e aña konserní ta akumulá ku e dianan di fakansi den e siguiente aña, basta ku e no ta surpasá un máksimo di 6 biaha e kantidat di dianan di trabou pa siman. Pues pa e empleado ku ta traha 5 dia pa siman, esaki ta nifiká ku e kantidat di dianan di fakansi no por surpasá 30 dia pa aña.

Pa kualke pregunta o komentario riba tereno di lei laboral, tuma kontakto via email info@justacuracao.com o jama 675-0610 / 524-0111.