Un manera ku e kontrato laboral por terminá ta ku e periodo a vense. Si partidonan a palabrá ku e kontrato pa tempu definí ta terminá despues di por ehèmpel un aña, e kontrato ta terminá outomátikamente sin nesesidat di duna preaviso (ojo: si esaki no ta inkluí den kontrato).

Por lo general no por terminá un kontrato pa tempu definí mas trempan ku e periodo ku e ta vense. Mester tin un situashon sumamente partikular pa e por jega asina leu. Esaki ta otro si na kuminsamentu partidonan mes a kumbiní esaki i a inkluí e posibilidat aki den e kontrato laboral. Den kaso aki si por terminá mas prome.

Naturalmente un kontrato pa tempu indefiní no ta vense outomátikamente. Kòrda semper ku pa por terminá un kontrato laboral manera menshoná aki riba, mester di pèrmit di departamentu di asuntunan laboral.

Kualke klóusula den e kontrato ku ta stipulá ku e kontrato laboral ta terminá outomátikamente si e trahadó ta na estado, pa motibu di parto o pa motibu di kasamentu, ta nulo.

Na e momentu ku un kontrato pa tempu indefiní ta terminá (no komo konsekuensha di un preaviso regular o anulashon dor di hues) i despues ta sigui pa tempu definí ku interupshon di menos di tres luna, mester duna preaviso pa terminá e delaster kontrato den e kadena. E término pa preaviso ta dependé di kuantu tempu henter e relashon a dura, kontá for di kuminsamentu di e promé kontrato pa tempu indefiní.  E regla aki tambe ta konta den kaso di servisio serka diferente doño ti trabou ku por konsiderá manera susesor di otro.

Pa kualke pregunta den area di lei laboral por tuma kontakto ku nos via email info@justacuracao.com òf via telefòn 675-0610.