Hopi hende ya ta konosí ku e regla kual ta stipulá ku si un trahadó haña mas ku un kontrato laboral pa tempu definí tras di otro, despues di un tempu outomátikamente e kontrato ta bira unu pa tempu indefiní. Awor ban wak esaki den mas detaje.

E regla ta en berdat ku si un empleado ta haña kada bes un kontrato pa tempu definí (por ehèmpel kada biaha pa 1 aña of 6 luna), e di kuater kontrato ta konta outomátikamente komo un kontrato pa tempu indefiní.

Esaki ta evidente. Pero tin mas.

Tambe e kontrato ku ta dura mas ku 36 luna (pues 3 aña) kontinuo outomátikamente ta bira un kontrato di tempu indefiní si e ta wòrdu siguí pa un kontrato di por ehèmpel 6 luna. Pues tin dos rekisito: mas ku 3 kontrato tras di otro òf mas ku 36 luna siguí. Tene kuenta ku asta den kaso ku tin un temporada di máksimo 3 luna den kual e empleado no a traha, esaki ta konta tòg komo si fuera ela traha. Striktamente tumá, esaki ta nifiká ku si un doño di trabou ta laga e empleado keda sin traha pa 3 ½ luna entre dos kontrato, e por keda duna kontrato pa tempu indefiní sin límite, komo ku e periodo te ku 3 luna so ta ser konsiderá di ta inkluí. Sin embargo den práktika esaki no ta un alternativa. Si ta opvio di un forma òf otro ku e doño di trabou ta purba di malusá e reglanan òf ta purba di evitá ku e tin ku duna un trahadó e siguridat ku lei ta brinda i ku e trahadó ta wòrdu perhudiká, e doño di trabou lo sali pèrdí. Un eksepshon ta si e kontrato di 3 aña kontínuo ta wòrdu sigí pa un kontrato di máksimo di 3 luna. Den kaso ey e delaster no ta bira un kontrato pa tempu indefiní.

Konklushon: OJO den kaso di kontratonan pa tempu definí ku ta sigui otro. Si no ta e intenshon di e doño di trabou pa tene e empleado pa tempu indefiní pero por ehèmpel pa durashon di un projekto so, komuniká esaki ku e empleado delantá i, mas importante, regla bo kosnan na drechi.

Pa kualkier pregunta relashoná ku esaki òf otro tópiko laboral, tuma kontakto ku nos via email info@justacuracao.com òf jama nos na 675-0610. Promé intake ta grátis i sin kompromiso!