Manera nos a mira den un post anterior, e periodo di preaviso ta diferente pa dunadó di trabou i pa trahadó. E aviso pa terminá e kontrato laboral mester wòrdu hasí adelantá, pues por ehèmpel 1 luna òf mas promé ku e lastu dia di trabou. Antes por a duna preaviso na final di luna so, awendía esaki no mester, a menos ku partidonan mes a akordá esaki por eskrito. Un punto importante ta ku no por duna preaviso durante di malesa di e trahadó. Esaki ta asina pa protehá e trahadó pa e no pèrde trabou pa motibu di malesa. Si e trahadó ta malu, pero e dunadó di trabou tin otro, (bon) motibu pa terminá e relashon e por hasi esaki por medio di anulashon dor di hues.

Tampoko por duna preaviso pa motibu ku e trahadó ta na estado, e ta bai kasa òf e ta (bira) miembro di sindikato ku ta representá trahadornan.

Pa por duna preaviso, e dunadó di trabou mester haña pèrmit di direktor di departamentu di asuntunan laboral. Si no a pidi òf a pidi, pero no haña pèrmit, no por terminá e kontrato laboral por medio di preaviso sin mester paga daño i perhuisio (aunke por purba haña anulashon dor di hues tambe). E preaviso ta diferente den kaso di un kontrato indefiní ku den kaso di kontrato pa tempu definí. Pa straño ku ta zona, ta mas fásil pa terminá e kontrato pa tempu indefiní ku e ta pa terminá un kontrato ta tempu definí, por ehèmpel di un aña, den kual no a inkluí e posibilidat pa terminashon interino di e kontrato. Esaki ta asina paso den kaso di e kontrato pa tempu definí, ta wòrdu presumí ku e dunadó di trabou a kalkulá su riesgonan i a keda sin pone posibilidat pa terminá promé ku tempu, i pues den e kaso ey e mester laga e kontrato vense di su mes. Esaki por ta otro den kasonan urgente i kual e dunadó di trabou mester por motivá i proba.  Mi ta rekomendá pues pa semper inkluí e opshon di terminashon interino den un kombenio. Bo no sa nunka kon bo ta pará den futuro. I naturalmente nota e último dia ku bo por duna preaviso, pa bo no lubidá!

Pa kualkier pregunta relashoná ku esaki òf otro tópiko laboral, tuma kontakto ku nos via email info@justacuracao.com òf jama nos na 675-0610. Promé intake ta grátis i sin kompromiso!