Den un post anterior nos a papia tokante di e periodo di prueba . Nos a papia tokante di e punto ku e periodo di prueba mester ta mes largu pa tur dos partido. Violashon di e regla aki tin komo konsekuensha ku e periodo di prueba ta inbálido. Tambe nos a menshoná anteriormente ku e periodo di prueba por ta un máksimo di dos luna. Violashon atrobe kemen nulidat. Esaki ta e doktrina di e “periodo di prueba di heru” (ijzeren proeftijd), kual ta impliká ku e reglanan aki ta determiná  i ku no tin eksepshon.

Awor nos ta bai wak mas den detaje algun aspekto di e periodo di prueba aki.

Nos a bisa ku por terminá e kontrato di un dia pa otro sin duna motibu. Esaki tin un ‘pero’: si e trahadó pidi pa e motibu, e dunadó di trabou mester dun’é. Sin embargo, nos a mira den otro post anterior ku no por terminá e kontrato den e periodo aki pa kualke motibu. Terminashon no ta posibel pa motibunan diskriminatorio, pa motibu ku e trahadó ta malu òf na estado. Por ehèmpel, partidonan a firma un kontrato den kual e periodo di prueba ta dos luna. Den e promé luna i mei e trahadó a funshoná ekselentemente i e dunadó di trabou no tin niun keho. Un siman prome ku e periodo di prueba kaba, e trahadó ta bisa su dunadó di trabou ku e ta na estado i e dunadó di trabou ta terminá e kontrato imediatamente. En efekto e ta den periodo di prueba ahinda, pero komo e motibu di terminsahon ta e embaraso, e trahadó por refutá esaki. Konklushon: no por malusá e periodo di prueba!

Otro punto di atenshon ta e máksimo di dos luna. E funshon di e periodo di prueba ta pa duna e partidonan e oportunidat pa wak si en berdat nan por traha ku otro. Esaki ta enserá ku si e dunadó di trabou tabatin e oportunidat kaba pa verifiká si e trahadó ta apto pa hasi e trabou, no ta posibel pa kombení un periodo di prueba mas. E regla aki no konosé eksepshon. Pues mester tene kuenta ku algun situashon, por ehèmpel si e empleado a jega di traha pa e dunadó di trabou via agensia di trabou (uitzendburo) i e ta bin hasi mesun trabou (awor no via agensia pero direktamente pa e kompanía). Den kaso aki no por palabrá un periodo di prueba nobo, pues e dunadó di trabou ya tatin e oportunidat pa wak si e trahadó ta apto pa e trabou. Un periodo di prueba nobo ta posibel den kaso ku e trahadó bai traha den otro funshon, den kual e mester di otro abilidat. Estriktamente mirá, si e empleado via agensia a traha e mesun trabou serka otro kompanía i despues ta bin traha serka bo den un funshon similar, tambe ta konta ku no por kumbiní un periodo di prueba nobo. Sin embargo, por rasoná ku e trahadó awor mester traha ku otro kliente i den otro situashon i pues e mester di otro abilidatnan, den kual kaso un periodó di prueba nobo sí ta posibel atrobe. Pues e resultado den e situashon aki no ta definitivo i mester ser determiná a base di e kaso spesífiko.

Tene kuenta ku si un kompanía ta ser tumá over dor di otro kompanía, e dunadó ti trabou nobo no por kumbiní un periodo di prueba nobo ku e trahadornan ku a keda den e kompanía bieu (si nan ta keda hasi mesun trabou). E periodo di prueba ey lo ta inbálido.

Bo tin kualke pregunta relashoná ku esaki òf otro tópiko laboral? Tuma kontakto ku nos via email info@justacuracao.com òf jama nos na 675-0610. E promé sita ta grátis i sin kompromiso!