Ora e dunadó di trabou i e trahadó ta disidí di drenta un kombenio laboral, mester tene kuenta ku esaki ta trese kune algun debernan pa tur dos partido. Esaki ta enserá tambe ku no por kita for di otro sin tene kuenta ku algun regla den lei. Lei ta stipulá e maneranan ku un kombenio laboral por terminá. Fuera di e opshon nan aki, no por terminá un kontrato laboral sin konsekuensia negativo pa un di e partidonan.

Un manera ku e kontrato laboral por terminó ta ku e periodo stipulá a vense. Si por ehèmpel partidonan a palabrá ku e kombenio ta terminá despues di un aña, e kombenio ta terminá outomátikamente e ora ey. Den sierto kaso mester tuma nota di e periodo di preaviso, pero e tópiko aki ta pa otro okashon. E terminashon outomátiko aki tambe ta bálido den kaso ku e kombenio kontinuá silensiosamente (pa mesun periodo ku e kombenio anterior, pero ku un máksimo di un aña).

E kontrato laboral tambe por terminá por medio di preaviso (opzegging). Den kaso aki mester tene kuenta ku algun reglamento den lei.

Tambe e por terminá pa un kousa urgente (ontslag op staande voet), pues un akshon grave di parti di e dunadó di trabou òf di e trahadó ku ta pone ku e otro partido ke terminá e kombenio laboral inmediatamente. Tene kuenta ku den kaso aki tin sierto regla stringente ku ta apliká.

Morto di e trahadó tambe ta pone ku e kombenio ta terminá outomátikamente. Esaki no ta asina ora ta trata morto di e dunadó di trabou.

Hues por terminá e kombenio laboral. Por terminá e kombenio di un dia pa otro sin duna motibu si ta trata e periodo di prueba (proeftermijn), i finalmente partidonan mes tambe por jega na un akuerdo mutuo (beeindiging met wederzijds goedvinden) pa terminá e kombenio sin tene kuenta ku reglanan.

Pa kualke pregunta den area di lei laboral por tuma kontakto ku nos via email info@justacuracao.com òf via telefòn 675-0610.