Mes kos ku e dunadó di trabou tin diferente deber ora ta trata di su empleadonan, e trahadó tambe tin su debernan.

E promé ta opviamente ku e trahadó ta komprometé su mes pa ehersé labor pa e dunadó di trabou. E mester hasi esaki mas mihó ku ta posibel, pues e tin e deber pa hasi un esfuerso pa ehersé trabou bon. Banda di esei, e trahadó a komprometé su mes pa hasi trabou personalmente. Pues e no por manda òf pidi otro hende pa hasi e trabou p’e. Komo ku e dunadó di trabou tin e outoridat pa duna instrukshon pa ku e manera ku e trabou mester wòrdu hasí, ta e deber di e trahadó pa sigui e instrukshon nan aki. Esaki naturalmente no ta apliká si e instrukshonnan ta irasonabel òf kontra di lei. Den e kuadro aki e trahadó mester tene su mes na reglamentu di trabou, kon tal ku esakinan ta kuadra ku lei.

Si e trahadó ta biba den kas di e dunadó di trabou, e tin ku tene su mes na reglanan di kas di e dunadó di trabou.

E trahadó tambe mester hasi i laga di hasi tur kos ku un bon trahadó ta hasi. Esaki ta enserá, ku e lista menshoná aki riba no ta un lista kompletu i ku den kada kaso spesífiko sierto kondukta of akshon di e trahadó ta wòrdu konsiderá nesesario òf apropiá.

Finalmente, e trahadó ku ta kousa daño na e dunadó di trabou òf un terser partido ta para responsabel pa esaki, solamente si ta trata un akshon intenshonal òf deskabeyá di parti di e trahadó. Den tur otro kaso, e dunadó di trabou mester para responsabel.

Si bo tin kualke duda òf pregunta riba e tereno di lei laboral, tuma kontakto ku nos riba info@justacuracao.com òf jama 675-0610.