Ora un dunadó di trabou òf e empleado ke terminá e kontrato laboral, mester tene kuenta ku un sierto periodo di preaviso. Esei kemen ku niun di dos partido por terminá e kontrato di un dia pa otro. Esaki por solamente den kaso ku ta den periodo di prueba ahinda, si tin algun motibu urgente kual ta pone ku e empleado no por keda (ontslag op staande voet), òf si partidonan jega na un akuerdo tokante di terminashon. Den tur otro kaso, mester tuma nota di e periodo di preaviso. Di esun ku no hasi esaki, por wòrdu eksihí pa paga indemnisashon di daño i perhuisio.

Awor kiko e periodo di preaviso ta? Manera hopi kos den lei, esaki ta dependé. Den e kaso aki ta dependé di e temporada ku e empleado ta den servisio.

Pa e dunadó di trabou e periodo ta un (1) luna si ta trata periodo di servisio te 5 aña. Di 5 te 10 aña ta dos (2) luna, mas ku 10 aña pero menos ku 15 aña ta tres (3) luna, i mas ku 15 aña ta kuater (4) luna. For di e periodonan aki por wòrdu desviá por medio di un kontrato laboral kolektivo (CAO). Den kaso ku ta palabrá un periodo mas largu pa e dunadó di trabou, esaki ta posibel basta e ta por eskrito.

Pa e trahadó e periodo di preaviso den lei ta un luna den tur kaso, eksepto si otro kos a wòrdu palabrá por eskrito. Pues si no tin nada por eskrito, ta un luna. Máksimo periodo di preaviso (por eskrito) pa e empleado ta seis (6) luna. Tene kuenta ku si desviá for di e regla general di un luna pa e trahadó (pues palabra un periodo mas largu), e periodo di preaviso pa e dunadó di trabou mester ta dòbel esun di e trahadó. Por medio di CAO por desvía di esaki, basta e periodo ku ta konta pa e dunadó di trabou no ta mas kòrtiku ku pa e empleado.

Pa kualkier pregunta relashoná ku esaki òf otro tópiko laboral, tuma kontakto ku nos via email info@justacuracao.com òf jama nos na 675-0610.