E dunadó di trabou tin diferente deber ora ta trata di su empleadonan. Kiko nan ta?

Komo dunadó di trabou bo ta naturalmente obligá na paga e suèldo riba e dianan stipulá. E pago di suèldo ta obligatorio for di momentu ku e empleado drenta den servisio te ora e relashon laboral terminá.

Den e temporada ku e empleado no ta traha, no mester paga suèldo. Sin embargo, e trahadó ta haña pagá  tòg den sierto okashon, manera por ehèmpel durante un temporada stipulá den kual e ta malu, ora e tin sierto obligashon stipulá pa lei, ora e ta na estado òf a kaba di duna lus. E dunadó di trabou tin ku sigi paga suèldo tambe den e temporada ku e empleado tabata ke i por traha, pero e dunadó di trabou no a hasi uso di esei pa motibunan ku ta trata e dunadó di trabou mes.

Tambe e dunadó di trabou mester duna e empleado akseso den su atministrashon  si e kalkulashon di e suèldo di e empleado ta dependé di algun informashon ku por resultá for di e atministrashon.

Den kaso ku e empleado tin debe otro kaminda i nan konfiská/pone beslag riba su suèldo , esaki no por ta mas haltu ku un tersera parti di su suèldo. Esaki no ta e kaso si e debe ta trata mantenshon di un hende (por ehèmpel un yu).

E dunadó di trabou ta obligá na paga e suèldo ku medio legal di pago, pues ku moneda di Korsou of moneda stranhero, basta esei wòrdu kalkulá a base di e kotisashon ku ta bálido e dia i luga ei. Tur otro forma di pago ta nulo i e empleado ta mantené su claim riba e dunadó di trabou, sin ta obligá na duna bèk lokual ela haña pagá kaba (i kual tabata nulo).

E suèldo mester wòrdu pagá segun periodonan stipulá den e kontrato. Un slip di suèldo (loonstrook) mester wòrdu entregá, den kual por mira di kiko e montante di suèldo ta konsistí, kual montantenan a keda retené, e datosnan personal di e trahadó, e periodo di lokual e ta trata, ki dia e empleado a drenta den servisio i pa kon largu.

Si pago di suèldo ta tuma lugá mas ku ocho dia despues ku e mester a wòrdu pagá, e dunadó di trabou ta obligá na paga interes pa e retraso, kual por oumentá konsiderablemente i lihe. Dedukshon di e suèldo ku un  posibel debe di e trahadó ta posibel solamente den sierto kaso spesífiko. Un klóusula ku ta trata retenshon di parti di e suèldo ta posibel solamente teniendo en kuenta reglanan spesífiko stipulá den lei.

Si (parti di) e suèldo ta wòrdu pagá den forma di hospedahe i kuminda i e dunadó di trabou pa un òf otro motibu no por ofresé esei (mas), e pago mester wòrdu hasí den forma di sèn. E montante ta wòrdu palabrá den kontrato, òf  segun kustumber. E trahadó ku ta biba serka e dunadó di trabou mester haña chèns pa por ehersé su religion (sin ku esaki tin efekto riba su suèldo) i pa relahá i distraé for di trabou. Tambe e trahadó mester haña djadumingu i dianan di fiesta liber, eksepto den kasonan ku otro kos a ser palabrá entre partidonan. E dunadó di trabou ta responsabel pa seguridat físiko i pa e aspekto di honor di su empleadonan, e no por forsa e trahado ku ta na estado pa traha mardugá pa sierto tempu promé ku e tin ku duna lus, pa hasi trabou físiko òf pa keda pará mas ku un ora sin interupshon.

Finalmente, e empleado por pidi -i e dunadó di trabou ta obligá na duna e empleado- na terminashon di e relashon laboral un sertifikado di e temporada ku e empleado a traha, su posishon i tambe (si e empleado ke) kon ela hasi su trabou i e motibu pakiko a terminá e relashon.

Manera por mira, e dunadó di trabou mester tene kuenta ku varios kos. En general, e dunadó di trabou mester hasi i laga di hasi tur kos ku un bon dunadó di trabou ta hasi. Esaki ta enserá, ku e lista menshoná aki riba no ta un lista kompletu i ku den kada kaso spesífiko sierto kondukta of akshon di e dunadó di trabou ta wòrdu konsiderá nesesario òf apropiá. Si bo tin kualkier duda òf pregunta riba e tereno aki, tuma kontakto ku nos riba info@justacuracao.com òf jama 675-0610.