Nos a mira den e artíkulo anterior di 29 di aprel tokante di periodo di prueba, ku durante e periodo aki un dunadó di trabou por retirá un empleado fásil i lihe for di trabou, sin mester tuma nota di e regla nan ku ta konta normalmente pa retiro, manera por ehèmpel periodo di preaviso (opzegtermijn) òf sin hasi petishon di retiro (ontslagaanvraag) serka direktor di asuntunan laboral. Tambe e regla ku un dunadó di trabou no por retirá un empleado durante enfermedat, no ta bálido durante e periodo di prueba.  Partidonan pues ta totalmente liber pa hasi òf deshasí manera nan ke! Of tòg no?

E periodo di prueba su orígen e intenshon ta pa duna e empleado i e dunadó di trabou un periodo den kual nan por wak si nan por traha huntu, si nan ta pas ku otro, òf no.

Den sierto kaso pues un retiro por ta inbálido, pa motibu ku e regla a wòrdu malusá, pues ela wòrdu usá pa algu ku e no ta trahá p’e. E ora ei nos ta papia di abuso di outoridat (misbruik van bevoegdheid). Esaki por ta e kaso ora e retiro tin di haber ku diskriminashon. Den e kaso aki e retiro no semper ta bálido. Mi ta bisa “no semper” paso den sierto kaso e diskriminashon (por ehèmpel a base di edat) ta bon motivá. E resultado di tur kaso, sin embargo, ta dependé di e sirkunstanshanan di e kaso individual. Niun kaso no ta meskos, pues tur kaso mester wak riba su mes. Nota si ku e ta bira difísil pa un empleado pa proba ku e retiro a tuma luga a base di diskriminashon, si e dunadó di trabou ta bisa ku ta pa motibu di mal funshonamentu di e empleado.

Otro sirkunstansha ku ta pone ku e retiro durante periode di prueba no ta bálido, ta ku e dunadó di trabou no ta tene su mes na e regla general ku e tin e obligashon pa trata su empleadonan manera un bon dunadó di trabou (goed werkgeverschap). Esaki por ta diferente kos, dependé atrobe di e sirkunstanshanan di e kaso.

Mester wak bon tambe si e retiro ta bálido den relashon ku e periodo di prueba mes. Es desir: si e periodo di prueba den e kontrato mes no ta korekto, e retiro tampoko no ta bálido. Por ehèmpel, manera nos a mira den e artíkulo anterior, e periodo di prueba no tin mag di ta muchu largu, òf mas largu pa e empleado ku pa e dunadó di trabou, òf si e no a wòrdu konvení por eskrito. Den e kaso nan aki, e periodo di prueba ta inbálido i esaki ta pone ku e no ta eksistente. Retiro pues, sin tuma nota di e regla nan normal pa retiro, ta inbálido. Den sierto kaso e dunadó di trabou mester paga un indemnisashon di daño i perhuisio (schadevergoeding). Tuma nota ku e retiro durante di periodo di prueba por tuma luga di banda di e empleado tambe, kaminda meskos mester tene kuenta ku e aspektonan menshoná ariba.

Tuma bon nota pues di e periodo di prueba i e motibunan di e retiro. Pa kualke pregunta, tuma kontakto ku nos via mail info@justacuracao.com òf via telefòn 675-0610.