E periodo di prueba ta un aspekto importante den e relashon di trabou, pues e ta duna tantu e dunadó di trabou komo e empleado e fleksibilidat pa ku e trabou. Tur dos partido tin e posibilidat en prinsipio di terminá e kontrato sin duna motibu of sin rason di un dia pa otro, pues sin tene kuenta ku un periodo di preaviso (opzegtermijn).
Tin algun kos ku mester tene na kuenta pa loke ta trata e periodo di prueba. E prome kos ta ku e periodo di prueba máksimo ta dos (2) luna. Tur loke ta mas largu no ta bálido i ta wòrdu konsiderá komo no eksistente. Un ehèmpel: den e kontrato ku partidonan a firma, tin inkluí un klóusula di periodo di prueba di tres (3) luna. Despues di dos luna e dunadó di trabou ta mira ku e empleado tòg no tin e kapasidatnan pa e trabou i e ke terminá e kontrato a base di e klóusula di periodo di prueba. Esaki no ta posibel! E klóusula ta inbálido paso e ta tres luna, pues no ta eksistí un periodo di prueba, ni maske ku e empleado a firma e kontrato. Tene na kuenta ku e sobrá di e kontrato si ta keda intakto.
Además e periodo di prueba mester ta igual pa tur dos partido, pues no por ta ku e empleado tin un luna so kaminda e dunadó di trabou tin dos. Esei tambe ta wòrdu konsiderá komo inbálido. Otro kos ta ku si e empleado a traha kaba pa e mesun dunadó di trabou, no por hasi uso atrobe di un periodo di prueba nobo, si e promé periodo tabata dos luna. Huntu e periodo por ta un máksimo di dos luna. Tin instanshanan kaminda si por konbeni un period di prueba nobo, por ehèmpel si ta un funshon kompletamente diferente, kaminda e empleado mester di otro kapasidatnan pa e por funshoná manera mester òf si ta hopi tempu pasá e empleado a traha pa e mesun dunadó di trabou.
Tambe ta importante ku e periodo di prueba mester ta un klóusula por eskrito. Si no tin nada por eskrito tokante periodo di prueba, ta wòrdu konkluí ku no ta eksistí un periodo di prueba. Pa kualkier pregunta tokante esaki òf otro topika laboral, tuma kontakto ku nos via info@justacuracao.com of jama nos na 675-0610